Eit triveleg musikalsk møte på CD
Eidarane sitt musikalske "radarpar", organisten Ralph J. Cupper og saksofonisten Inge Asbjørn Haugen er i farten igjen med ny CD "The White Cliffs of Dover", Evergreens volume 2.
Den første CD'en dei to gav ut "Over the Rainbow", Evergreens
volume 1, kom ut i 2001. Med over 500 selde eksemplar må det prosjektet
seiast å vere vellukka både økonomisk og ikkje minst
musikalsk.
No er det klart for oppfølgjaren "The White
Cliffs of Dover", ei variert samling godt kjende melodiar - frå orgelstykke
og folkemelodiar til danselåtar.
For mange er vel organisten Ralph J. Cupper ikkje
den mest kjende. Han er fødd i Norwich i England i 1954, har musikkutdanning
frå "The Royal Academy of Music i London", studerte seinare orgelspel,
sist med den kjende nederlandske organisten Bernard Bartelinck. Før
Ralph J. Cupper og kona Karin flytta til Noreg i 1988, var han kantor og
organist i fleire kyrkjelydar i fylket Norfolk. Same tid tok han utdanning
på universitetet i teologi og androgogikk. Cupper er tilsett som
kantor og organist i kyrkjelydane i Eid og Stårheim, der han og kona
er særs aktive i kyrkjelydsarbeid, i tillegg til dei musikalske oppgåvene
hans. Han har og gjeve fleire konsertar både i Vest-Tyskland og Noreg
og ei rekkje stader i England, forutan å ha spela i BBC og NRK.
Inge Asbjørn Haugen, opprinneleg frå
Hornindal, kjenner mange friidrettsinteresserte som ein av dei ivrigaste
maratonløparane her i landet, med over 200 løp bak seg.
Like kjent er Haugen i det frivillege musikkmiljøet,
etter stor aktivitet som amatørmusikar. Også her i Gloppen,
som klarinettist i korps, då han arbeidde ved likningskontoret på
Sandane. Elles har han vore med i korps i Hornindal og Eid, Sogn og Fjordane
Storband, Sogn og Fjordane Symfoniorkester, Hornindal Storband, Haugens
Kvintett, Mixmasters & The Voices, og speling i kyrkjeleg samanheng.
Frå 1989 tok samarbeidet med Ralph J. Cupper til.
Ein CD å glede seg over
La det berre vere sagt med ein gong: "The White Cliffs of Dover" er
ein CD å glede seg over. Det svingar og kling, "real swing" i godt
samspel mellom organist, og innimellom, ein drivande god altsaksofonklang.
Det er likevel eit utruleg bra samspel som kjenneteiknar
CD'en, evig-grøne melodiar kjem som perler på ei snor. Tittelmelodien
er alt nemnt, Errol Garner sin "Misty", "Skylark" av Carmichael, "Ut mot
havet" av Edvard Fliflet Bræin, salmen "Amazing Grace", "Folketone
frå Hornindal" arrangert av Eivind Groven, og Carola Häggkvist
sin "Himlen i min famn" - alle i solid samspel dei to utøvarane
imellom.
Ralph J. Cupper sine orgelsoloar på CD'en
viser også ein musikar med eit variert repertoar, frå "Sonata
de Primo tono Para Trompeta Real", "Psalm-Prelude Op. 32 nr. 1" og "Trumpet
March" - komponert til Lady Diana og Kronprins Charles sitt bryllaup i
juli 1981 - til orgelarrangement av John Phillip Sousa sin "The Stars and
Stripes forever". Så ulik i klang og dynamikk korpsfolk kan oppleve
dette ikonet av ein marsj. Like fullt er det berre å undre seg over
den tekniske framføringa.
Eit triveleg musikalsk møte med amatørsaksofonisten
og organisten - og sikkert for mange med oss.
Odd Hansen
Sist oppdatert: 05.10.2004
Kommentarar til: Inge
Asbjørn Haugen.
Tilbake til: The White Cliffs of Dover